Yunan rəvayətinə görə, e.ə. IX əsrdə Frigiya çarlığında (Kiçik Asiya) baş verən daxili qarışıqlıq zamanı kahin növbəti çarın örtülü araba ilə gələcəyini xəbər verir. Elə bu vaxt Qordi adlı kəndli öz arabası ilə oralara gəlib çıxır və dərhal da çar elan edilir. Qordi öz arabasını Zevsə hədiyyə edir, özü də əskeş qoşqusunu dirəyə olduqca mürəkkəb düyünlə bağlayaraq uclarını məharətlə gizlədir.
Bundan sonra kahin bu düyünü açanın bütün Şərqin hökmdarı olacağını elan edir. Ancaq bir neçə əsr ərzində bu düyünü açmaq üçün göstərilən cəhdlər bir nəticə vermir. Bundan sonra həlli müşkül görünən problemlərə “qordi düyünü” deyilməyə başlandı.
E.ə. 334-cü ildə Böyük İsgəndər Əhəmənilər imperiyasını fəth etmək üçün Kiçik Asiyaya daxil olur. E.ə. 333-cü ildə İsgəndər qədim Frigiyanın paytaxtı Qordiuma yaxınlaşır. Qordi düyünü hələ də burada, Zevsin məbədində idi.
“Bu nədir?”, – deyə o soruşur. Ona bu düyünü açanın bütün Şərqi fəth edəcəyini deyirlər. İsgəndər qılıncını qınından çıxararaq bircə zərbə ilə düyünü kəsir.
“Bu məsələni mən belə həll edəcəm”, – deyərək Şərqi fəth etməkdə davam edir. Bundan sonra “Qordi düyününü kəsmək” kəlməsi ilk baxışdan həlli mümkün olmayan məsələnin güc yolu ilə həll olunması mənasında işlənir. (Ayzek Azimov. Sözlərin tarixi)
